اتعلم كيف تعمل الجبنة في البيت

أكتر شي بيفرحني من جووووة كدا عيشة الفرن الحااااارة ديك   , محشية بي جبنة عمنا  الخواجة

" مايسترو بينوتي " الما بتغباني  , مع كباية الشاي بالنعناع في الحوش

أصصصلو لا تقول لي استيك من باريس ولا بيتزا من ايطاليا ... جبنة الدويم الوااااحدة دي , والنعناع البيتي !!   

الجبنة السودانية

وطبعا مع الزيادات الخورافية في أسعار الموية والاوكسجين , الواحد بقى بيشيل هم التموين وما بيعرف يشتري شنو ويخلي شنو !!   أنا عن نفسي ممكن أستغنى ليكم عن الكورن فليكس والجالاكسي وزبادي الفواكه  

لكن الجبنة ؟؟   

جبنتي الواحدة دي ؟؟؟  

هزلت على فكرة, أوكي؟!  

العسكرية تصرف ياخواننا ..الواحد ما يخت الخمسة في الاتنين ويرجى الري.. لازم نتصرف ...لازم ندبر أمورنا المنزلية ...لازم نعمل جبنة جبنة سودانية في البيت   

بادرنا نحن أختكم في الكفاح, وحب الجبنة, والمزاج الصاح , بالبحث والتمحيص, لغاية ما وجدنا الأتي :

# كيلو الجبنة في السوق بي 80 جنيه

# كيلو الجبنة البيتي بي 50 جنيه محسوب فيها الاضافات وحق الغاز!

وشكرا !!  

فا ليييه ما أعملها في البيت كل يوم وأكلها كل يوم وأكون سعيدة كل يوم ؟؟ لييييه لأ؟  

طريقة عمل الجبنة البيضاء السودانية

طبعا كل بلد عندها طريقتها, ناس يعملوها بالمكبس والمنفحة (الأنفوحة) , وناس بزبدة اللبن , لكن بيشتركو في مقدارين أساسيين وهم الحليب والملح , ودي حاجتين ما بيخلى منهم المطبخ السوداني . طبعا مهم نذكر انو طعم الجبنة بيتحدد بنوع الحليب المستخدم , فا بالله عليكم حليب إبل ما معانا !!   

أنبوبة غاز في ؟؟ خل تفاح عدد 6 ملاعق في ؟ مافي ؟ خلاص ليمونتين كبار في ؟ بس خلاص الجبنة مرقت !!   

ياخ الموضوع بسيط لدرجة تزعل !!   كيف أنا ما عملت جبنتي براي من 20 سنة مثلا , بدل أرجى سيد الدكان اللي بيفتح يومين ويسافر البلد 75 يوم .. الجبنة مطلب يومي أساسي وحساس ياخواننا ! وعندو

أبعاد نفسية وكدا !!  

المهم.. 

أرح نعمل كيلو أبوسريع المغرب جا   

أغلي 2 كيلو حليب (4.5 رطل)  في حلة كبيرة  و يفضل حلة تكون تقيلة و ما بتلصق زي حلل السراميك و الجرانايت, مع10 جرام ملح أو أقل حسب الرغبة , لازم تكوني بتقلبي بكمشة أو معلقة كبيرة باستمرار , وقت التقليب دا وقت قيم ،ممكن الواحد يستفيد منو في الاستماع لشرحبيل أحمد حيث اللحن الفريد ,وطعم الجبنة ,قطع شك سيأخذك الى هناك يعني !   

أها قلبنا الحليب وبدا يغلي ؟ أول ما يغلي كدا طوالي نشيلو من النار ونضيف عليهو الخل أو الليمون , وممكن الاتنين مافي ما يمنع .

يلا في اللحظة ديك والتو , لحظة ميلاد الجبنة   

بتشوفي اللبن انفصل لي جزئين , التحت موية جبنة صرف , والفوق ؟حبيبة هارتي...   

كمالة الفهم , وخفافة الألم   ست الرصة ومدمرة المنصة  

حمالة الأسية و....

"سومي .  ....ركزي "  

المهم

المفروض يا سيدتي العزيزة , تكوني مجهزة صفاية كبيرة شوية أو كمشة مفتحة , حتستخدميها عشان تفصلي بيها الجبنة من الموية في حلة أو كورية, مفروش فيها شاش مغلي ومعقم .. يلا الشاش دا زي بر الوالدين بالظبط, وتعقيمه ما صعب , خلو حنكشة سومي دي !  

أها أحكي لي ..الجبنة ملت الشاش ؟   ياااااااا بخت الشااااش والكورية والمطبخ وكل شي...   ياخواااانا جبنتي طلعت   أقصد جبنتك....   

المهم !! 

ما عليكي إلا إنك تربطيها بالشاش كويس وممكن تشكليها حسب الرغبة (غالبا البلوك عبد الواحد داك لأنه أريح شي ومناسب لكل التلاجات) .

بعد الربطة دي بتختيها فوق قريل أو أي سطح مفرغ يشبه القريل (في حال العدم ممكن تستخدمي القريل الموجود جوة الفرن يا بيبي  )

وبتختي فوق ليهو حاجة تقيلة

(صحن تقيل , غطى حلة فوقيهو برطمان مخلل مليان..وهكذا) عشان تصفي باقي الموية , الكلام دا بياخد من 30 دقيقة لي ساعة بالكتير , بعدها بتختي البلوك في علبة في التلاجة .   

دايراها خالية دسم ؟؟ المافي شنو ؟؟ أصلو ما بنتوقف احنا ..    نغلي اللبن دا ونبردوا كذا مرة , وبعد كل تبريدة نشيل الجمادة برة لغاية ما يبقى خفيف ولفيف , بعد داك نواصل كفاحنا بي خلنا وليموننا عادي ..انتو قايلننا بنخاف ؟ إحنا أصلو ما بنخاف !!    

المهم .. 

الجبنة مرقت    شاي النعناع وين ؟؟؟

و اليشارة السمحة اذا حابة تبيعي جبنتك دي ممكن عادي تعلني عنها في تصنيف خدمات تجهيز الاطعمة  او اي نوع اكل حابة تبيعية البيت بيتك و السوق حقك و مجاناً.. اعلني يا زوله